جثة مين دي ياست .. قصة قصيرة طريفة ع الماشى

– جثة مين دي يا ست ؟

— جثة جوزي يا حضرة الظابط، وانا اللي قتلته؟

– قتلتيه ليه؟

— شوف يا باشا انا هحكيلك من الأول … انا كنت دكتورة قد الدنيا وكنت اجمل بنات كلية الطب .

– يامدام من فضلك اختصري وبلاش فشر

— انت هتسمع ولا تحصله؟

– ………………؟!

— اه ماهم مش هيعدموني مرتين

– لا اتفضلي حضرتك، بس بسرعة يعني لو ممكن عشان يعني العساكر رجليهم نملت

— بقى انا كنت جميلة جميلات كليةالطب والبيه المرحوم كان المعيد بتاعي حبني ورسملي عالسما جنة فيها الهنا

– اللهم طولك ياروح

— وقالي هنعيش في تبات ونبات

– لابقولك ايه، لو هتقعدي تغني اقتليني اسهل

— وقالي هسيبك تعملي ابحاثك وتحققي ذاتك وهساعدك في الكبيرة قبل الصغيرة قولت احلوت سنيني

– ياست خلصينا، هي نوباتشية سودا انا عارف

— بعد الجواز زي ماتقول كده سهي عليا محسيتش بنفسي غير وانا في ايدي زكريا واشرف وسهى وبرضع نجلاء

– كل ده وسهي عليكي؟ امال لو كنتي مركزة كنتي عملتي ايه!

— بعيد عنك نسيت ابحاثي واحلامي ونسيت اني امرأة

– آه خلصنا من الاغاني هنخش عالأفلام.. ياستي العساكر اللي جايبهم معايا هيسوسو من البرد والمرحوم قرب يتحلل

— ماهو ده بقي السبب

– اللي هو ايه؟

— كان خلقه ضيق كل ما آجي احكيله حاجة يقولي: مصدع انجزي

– لا لا خدي راحتك خالص

— فضلت مستحملاه وكاتمة في نفسي لحد امبارح بالليل

– ايه بقي اللي حصل امبارح بالليل؟

— معرفش

– معرفش! ما تعرفيش ايييييييييييه؟!

— بعد ما رضعت نجلاء وذاكرت لزكريا وغيرت لاشرف وحليت لها واجب الماث، ورجعت حمرت بطاطس للصبيان وسندوتشات نوتيلا للبنات وكنست الشقة ولميت الزبالة ونشرت الغسيل ونقعت الفول وشطبت الحوض وركبت الستاير وكويت القمصان وصبنت الحمام وحضرت شنط التمارين ودفعت الجمعية وعملت مهلبية وروقت التلاجة وتبلت البانيه وقشرت بصل وكلمت السوبر ماركت ورديت عالعيال في اسئلة من سيربح المليون وكلمت مستر العربي عشان الواد واتفقت مع ميس الفرنساوي عشان البنت..
نده عليا المرحوم من مكانه عالكنبة الطاهرة دي بصوته اللي اتخفي ده وقالي: يا ساااااااااااامية ممكن اعرف كنتي بتعملي ايه طول النهار؟!

– ………..؟!

— ماحسيتش بروحي يا باشا غير وانا ساحبة السكينة اللي كنت بقمع بيها البامية وبقور مخه عشان اطلعه واعرف في جواه ايه؟

– هااااارسود دانا لسة قايل لمراتي كدة في التليفون

— هع.. الحق نفسك بقى

– ياعسكري قفل المحضر وبلغ عن شروع في قتل واديهم عنواني

 

[highlight color=”yellow”]تابعونا للمزيد من المعلومات الغريبة والمختلفة و القصص القصيرة و الحكم، للمزيد اضغط على ع الماشى[/highlight]

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

This site uses Akismet to reduce spam. Learn how your comment data is processed.